نوور سەلمان
قۆناغا سێیەم-بەشا دەرمانسازیێ-زانینگەها نێڤنەتەوەیی یا تیشك – هەولێر
ژیانێ ئەز فێرکرم کو دگەل دەوروبەرێن خوە، ب هەمی هێز و شیانێن خوە، ب باشترین و جوانترین شیواز سەرەدەریێ بکەم. دەما كەسەك دگەل من دئاخڤێت، گەرەكە بێ دەنگ بم، ب کویری گوهداریێ بکەم، روویێ من گەش بیت، و ئەگەر ئەو ئاخەفتن یا چاکیێ نەبیت، خوە بێ دەنگ بکەم.
ژیانێ ئەز فێركرم كو گرنگیێ ب هەر کەسەکێ ل دیف حەق و راددەیی یا وی بدەم. هەژی گوتنێ یە، هەر کەسەک د ڤێ ژیانێ دە هەتا رادەکێ هەژی قەدر و رێزگرتنێ یە، ئەڤ رادەیە ژی ل گوڕی نێزیکی یا وی كەسی و هەروەها ئاوایێ سەردەریی یا وی یە بۆ مرۆڤی. نێزیكی یا هەندەكا ژ لایێ (خێزان، مالبات و خزم و مرۆڤایە) و هەندەك كەسێن دی ژی ژیان و قەدەر یێن بووینە سەدەم بۆ نێزیكبوونا وانا وەكە (هەڤال و دوست و جیران).
لێ دگەل هندێ ژی ژیانێ ئەز فێركردم هەر كەسەكێ ل گوری ئاستێ وی قەدرێ وی بگرم، چونكی هنەك كەس ئەگەر ژ رادەیا وی پتر قەدرێ وی بهێتە گرتن، ژدەست دەردكەڤن، هنەك جارا وەها هزر دكن كەساتی یا كەسێ بەرامبەر یا كێمە، خوە ل سەر سەرێ وی زاڵ دكن، ژبەر هندێ گەرەكە سەرەدەریی و قەدرگرتنا كەسێ بەرامبەر ل گوری كەساتی یا و سەرەدەریێن وی بیت. بۆ نموونە هەکە کەسەک هەژی 60% ژ رێزگرتنێ بیت، و تو 80% رێز و قەدرێ بدەییێ، د وی دەمی دە تو 20% ژ قەدر و رێزا خوە لدەڤ وی کەسی ژ دەست ددەی.
پێدڤییە هەردەم دگەل هەمی کەسێن دەوروبەرێن خوە ب جوانترین ئاوا سەرەدەری و رەفتارێ بکن، دگەل هەمی یا ب روویەكێ گەش، ب ئاخەفتنێن جوان، رێزێ ل هەمی یا بگرن، لێ زێدەگاڤێ د ڤێ چەندێ دە نەكن. هاریكار بن، دلۆڤان و دل نەرم بن دگەل هەمی یا بێی جوداهی، لێ ل دیف رادەێ كو هەژی كەسێ بەرامبەر بیت.